NATAL 2022
Per culpa de ‘na guèra malandrina,
la Russsia cuntra l’Ucraina,
quèst ann ul Natàl el sarà püsee puerétt,
al post di regài gh’è de pagà i bulétte,
de la lüs, del gas, de la curént
che següten a créss cunt ul bel e ul breut temp.
La spesa pö l’è diventada un’imprèsa,
gh’è nient de fa, l’è cumè ‘na turta che següta a lievità.
Cumé la farà sta pòra gént restada senza peu niént,
al fòsc e al frècc senza ca e senza técc,
senza gnàncha un asinïn per sculdàss un cicïn
cumé ul Santo Bambïn.
Però incaa in del nost bel paès,
manchen mia i surprès, franamènt e allagamènt,
mèten in ginòcc tanta brava gènt.
In ogni part del munt, òmen e donn ris’cen la péll
o de vès impresunà per un poo de libertà.
L’è propri ‘na brüta situaziòn, ma bisugna mia pert la rèson.
Bastarìa un poo püsee de coeur e de sentimént per fà stà bén tanta gént.
Urmài l’è Natàl, un avenimént pròpi spècial.
Ul nost Signür èl se degnà de vegnï a stà in de neum,
l’è nasü bambïn cumè neum tra gioia e dulùr
per purtà nel münt teutt ul so àmur e per salvà ‘sta pòra umanità.
Bisùgna festegià stu grant avèniment!
Ul Natàl l’è témp de buntaa e de cuntentetéza per teucc,
l’è ‘na fèsta pe i öcc. Ul paès teutt inluminà
cunt i albuséi che bèrlüsén che e là e in ogni ca
un presèpi el gaa un post riserva, el peu mia mancà.
Quest’ann incaa la Banda la turnerà a girà per i ca
a sunà i canzòm de Natàl per augurà a teucc pas e sèrenità.
Buon Natàl!
Bruna Riva
